იდეიდან განხორციელებამდე - რა კრეატიულ შესაძლებლობებს იძლევა Adobe: სიღნაღის თეატრალური ფესტივალის ვიზუალური იდენტობა
იდეიდან განხორციელებამდე - რა კრეატიულ შესაძლებლობებს იძლევა Adobe:
სიღნაღის თეატრალური ფესტივალის ვიზუალური იდენტობა
Noventiq-ის გუნდმა ვიცით, რომ პროექტის იდეიდან მის განხორციელებამდე საკმაოდ დიდი გზაა. ეს შემოქმედებითი სამუშაო პროცესი კომპლექსური ამოცანების ერთობლიობაა: კონცეფციის ირგვლივ საერთო აზრის ჩამოყალიბება, იდეის შეთანხმება ყველა დაინტერესებულ მხარესთან, ვადებისა და შედეგების განსაზღვრა, ინსტრუმენტების შერჩევა., ამ უკანასკნელზე კი ყველაზე მეტადაა დამოკიდებული პროექტის საბოლოო შედეგი.
გადაგვწყვიტეთ წამოგვეწყო - დიზაინერების შესახებ ექსკლუზიური ინტერვიუების სერია, რომელიც ნათლად დაგვანახებს, თუ როგორ არის შესაძლებელი მათი კრატიული იდეების რეალიზება Adobe-ს პროგრამული უზრუნველყოფით. მინიმალისტური ვიზუალური კომპოზიციებიდან დაწყებული რთულ ციფრულ ილუსტრაციებამდე, ეს ინტერვიუ შეიძლება აღმოჩნდეს ინსპირაციისა და შთაგონების წყარო, როგორც გამოცდილი პროფესიონალებისთვის, ასევე დამწყები დიზაინერებისთვის.
ჩვენ გადავწყვიტეთ, გაგვერკვია, თუ რა რესურსების დახმარებით აღწევენ დასახულ მიზანს კრეატიული საზოგადოების წარმომადგენლები საქართველოში.
შევარჩიეთ რამდენიმე საინტერესო პროექტი Behance-ზე და ვესაუბრეთ მათ ავტორებს, რათა გაგვეგო Adobe-ის რომელ პროდუქტებსა და ინსტრუმენტებს იყენებდნენ პროექტზე მუშაობის პროცესში.
თავდაპირველად, წარმოგიდგენთ ინტერვიუს, ერთ-ერთი საინტერესო და თვალსაჩინო პროექტის „სიღნაღის თეატრალური ფესტივალის“ ბრენდბუქის ავტორებთან, სალომე საყვარელიძესთან და ელენე ბოჭორიშვილთან.
- მოგვიყევით თქვენ შესახებ. რამდენი ხანია, რაც გრაფიკული დიზაინით ხართ დაკავებული? როგორ მოხვდით ამ სფეროში?
სალომე: 5 წელზე მეტია, რაც დიზაინერი ვარ. ადრეული ბავშვობის წლებიდანვე მკაფიო ინტერესი მქონდა დიზაინის მიმართ, მიყვარდა ჟურნალები და მათგან კოლაჟების კეთება. ერთი პერიოდი მთელი ოთახი კოლაჟებით მქონდა გაწყობილი და ახლაც რომ მახსენდება, დიდი სიამოვნებით მექნებოდა ასეთი ოთახი, თუმცა, განათლება ბიზნესის მიმართულებით მაქვს მიღებული, რაც საკმაოდ დამეხმარა, როგორც კომპანიის ჩამოყალიბებაში, ასევე სხვა ბევრი ტექნიკური საკითხის გამართვაში, რაც თან სდევს დიზაინის სტუდიის ჩამოყალიბებას.
ამ სფეროში მოხვედრას ჩემს მეუღლეს და ჩვენს საერთო მეგობარს ვუკავშირებ. იმ პერიოდში ვიყავი დასაქმებული და დრო არც ისე ბევრი მქონდა, მაგრამ ამან საკმარისი მოტივაცია შემიქმნა, რომ დამეწყო საკუთარი მიზნისკენ სწრაფვა. მესწავლა ის, რაც მომავალში გახდებოდა ჩემი ნაწილი. საბოლოოდ დავიწყე იმის კეთება, რაც ყველაზე მეტად მომწონს.
შევარჩიე ციფრული დიზაინის კურსი, შემდეგ კი გავიარე ინტერფეისის, ბრენდინგისა და UI/UX_ის დიზაინის კურსი. დღემდე ვცდილობ აქტიურად განვაგრძო სწავლა. მოგეხსენებათ, ციფრული ინდუსტრია საკმაოდ სწრაფად ვითარდება და აუცილებელია მასთან ერთად განვითარდე.
Oeuvre Design Studio მე და ელენემ დავაფუძნეთ. დიზაინთან დაკავშირებით მიღებულ საერთო გადაწყვეტილებებზე მუდამ მარტივად ვთანხმდებით, რაც ნიშნავს იმას, რომ ძირითად საკითხებში ხედვა ერთმანეთის მსგავსი გვაქვს. ეს ნაწილობრივ გვიმარტივებს მუშაობას და ამავდროულად, პროცესსაც უფრო საინტერესოს ხდის.
ელენე: ბავშვობიდან მამაჩემის სახელოსნოში ვატარებდი ყველაზე დიდ დროს, რომელიც პროფესიით ფერმწერია და შემდგომ გახდა ფეხსაცმლის დიზაინერი. ყოველთვის ძალიან დიდი ინტერესი მქონდა დიზაინის მიმართ. შემდეგ სამხატვრო აკადემიაში ჩავაბარე, რაც ჩემთვის საკმარისი არ აღმოჩნდა და გადავწყვიტე მეგობართან ერთად ჩამებარებინა ჯიპაში - რეკლამისა და გრაფიკული დიზაინის კურსზე. მეგობარი, რომელთან ერთადაც ჩავაბარე უნივერსიტეტში, დღეს ჩვენი გუნდის წევრია, თუმცა ამ კონკრეტულ პროექტში მონაწილეობა არ მიუღია, რადგან იმ პერიოდში სხვა პროექტზე მუშაობდა.
- დიზაინის რომელი მიმართულებით უფრო მუშაობთ?
სალომე: კონკრეტულად ვერ გამოვარჩევ. ვმუშაობ, როგორც გრაფიკული დიზაინის მიმართულებით, ასევე ვებ დიზაინისა და UI/UX - ის მიმართულებითაც, თუმცა პროექტებიდან გამომდინარე გრაფიკული დიზაინის განხრით უფრო ხშირად გვიწევს მუშაობა. თუმცა აღსანიშნია, რომ უშუალოდ ვიზუალური მასალის შექმნამდე ვატარებთ კვლევას, რომლის დროსაც აუცილებლად განვიხილავთ კონკურენტებს, როგორც ქვეყნის შიგნით, ისე მის გარეთ, რაც საშუალებას გვაძლევს კარგად გავერკვიოთ სამიზნე ობიექტის თავისებურებებსა და საჭიროებებში.
ელენე: გრაფიკული დიზაინის მხრივ ვსპეციალიზირდები.
- როგორ გაჩნდა ეს პროექტი? ვინ იყო პროექტის დამკვეთი? რა მთავარი მოთხოვნები იყო დიზაინის კუთხით დამკვეთის მხრიდან?
ელენე: ჩვენ ხშირად ვთანამშრომლობთ თეატრალურ უნივერსიტეტთან და სწორედ მათმა წარმომადგენლებმა გადაწყვიტეს, კულტურის სამინისტროს მხარდაჭერით სიღნაღის თეატრალური ფესტივალის დაფუძნება. ფესტივალის კოორდინატორმა შემოგვთავაზა ამ ღონისძიების ვიზუალურ მხარეზე მუშაობა და ჩვენც დიდი სიამოვნებით დავთანხმდით. ფესტივალი დაორგანიზდა პირველად და მისი იდენტობა სრულად ჩვენი შექმნილია.
დამკვეთის მხრიდან ორი მთავარი პირობა უნდა ყოფილიყო დაცული: პირველი ის, რომ სახალხო თეატრი უნდა ყოფილიყო აქცენტირებული რაიმე სიმბოლოთი, რომელიც გამოხატავდა თეატრს, როგორც მრავალფეროვან ცოცხალ ორგანიზმს და მეორე, ქალაქი სიღნაღის გამოკვეთა იყო აუცილებელი.
- ვის ეკუთვნოდა ბერიკაობისგან განსხვავებული კონცეპტუალური იდეა, თქვენ თუ დამკვეთს? თუ თქვენ, როგორ მიხვედით ამ იდეამდე?
სალომე: ეს იყო დამკვეთსა და შემსრულებელს შორის ჰარმონიული სინთეზის დამსახურება. ორივე მხარემ მნიშვნელოვანი როლი შევასრულეთ ამ კონცეფციამდე მისასვლელად. თავდაპირველად წარმოგვედგინა რომელიმე თეატრალური პერსონაჟის ჩანახატის გაციფრულება, გზადაგზა ვთავაზობდით დამკვეთს მუდბორდებს და ვუზიარებდით ჩვენს ხედვას და ვცდილობდით, თვითონ დამკვეთიც ჩაგვერთო სამუშაო პროცესში, რადგან ჩვენთვის თეატრი უცხო სფეროა და ძალიან მნიშვნელოვანი იყო ამ საქმის მცოდნის ჩართულობა სამუშაო პროცესში. ამ იდეების გაზიარების დროს დამკვეთის მიერ გაჟღერდა ბერიკაობისა და ყეენობის თემა, რადგან ეს ფესტივალიც სახალხო თეატრებისა და სამოყვარულო დასებისთვის ტარდებოდა.
- აღნიშნული პროექტისათვის, რატომ იქნა მიღებული გადაწყვეტილება გამოგეყენებინათ მარტივი გეომეტრიული ფორმები, მშვიდი ფერები, მაშინ როდესაც პირიქით, თეატრთან ხშირად ასოცირდება რთული, ანტიკური, დეტალიზებული, ნიღბების სურათები, თეატრალური სცენა და სხვა?
სალომე: გეთანხმებით, თეატრებს უმეტეს წილად დეტალიზებული და უხეში ვიზუალები აქვთ, ამის მიზეზი როგორც თეატრის ხასიათის, ასევე ჩემი აზრით, ძველებური დიზაინის დამსახურებაცაა. ადრე ტრენდული იყო ე.წ. ჩახუჭუჭებული ლოგოები. დიზაინის სფეროს განვითარების შედეგად, მისი პრინციპების საფუძველზე, ლოგოს ვიზუალი მარტივი, თვალისთვის ადვილად დასამახსოვრებელი უნდა ყოფილიყო. თუ დავაკვირდებით, თანამედროვე თეატრების ტენდენციებს, სწორედ ასეთი მარტივი გადაწყვეტა აქვთ. ჩვენი თავდაპირველი მიზანიც ეს იყო, რის გამოც ვარჩიეთ მარტივი გეომეტრიული ფიგურებით პრობლემის გადაწყვეტა. ხოლო ფერების ინსპირაცია სიღნაღის შენობების ფასადებიდან ავიღეთ.
- თუ შეიძლება, მოგვიყევით როგორ მიხვედით ბერიკაობის შთაგონებიდან მარტივ სიმბოლოებამდე, რაც საბოლოო ჯამში გახდა ლოგოს და პროექტის იდეის საფუძველი.
ელენე: ბერიკაობა ნიღბების ქართული იმპროვიზებული ხალხური თეატრია. იგი დასაბამს უძველესი დროიდან იღებს. ჩვენამდე მოღწეულია ბერიკაობის 100-მდე სიუჟეტი. მათი უმეტესობა კომიკურია და ძირითადად საყოფაცხოვრებო თემაზეა შექმნილი. ბერიკაობის შესწავლის შედეგად გავიგეთ, რომ მისი ტრადიციული ნიღბები იყვნენ: მეფე (სასიძო), კეკელა (სარძლო), მაჭანკალი, გლეხი, თავადი, თათარი, მოსამართლე, ექიმი, ხუცესი, აგრეთვე ტახი, დათვი, თხა და სხვა ცხოველები. სწორედ ისინი გახლავთ ჩვენი ლოგოტიპის ინსპირაცია. დავიწყეთ პერსონაჟების შერჩევა თუ რომელი იყო ჩვენს შემთხვევაში რელევანტური. პირველი რაც თვალში საცემი იყო, ეს იყო მაჭანკალი, რომლის სიმბოლოდ ავარჩიეთ გულის ფორმა, რომელიც ამავდროულად სიმბოლიზირდება სიღნაღთან - როგორც სიყვარულის ქალაქთან. შემდეგ, მაჭანკლიდან გამომდინარე ავარჩიეთ დანარჩენი პერსონაჟები მეფე და კეკელა ანუ სასიძო და სარძლო, რათა მაჭანკალი ყოფილიყო მათი დამაკავშირებელი, ხოლო მეოთხე პერსონაჟი ავიღეთ მელა, რადგან ბერიკებში ბევრი ცხოველი პერსონაჟი გვხვდება და თან დავახასიათეთ, როგორც მაჭანკლის საპირისპირო ფიგურა, რომელსაც სურს სარძლოს და სასიძოს დაშორება. მელას ეს მახასიათებელი ლოგოშიც შესამჩნევია თუ დავაკვირდებით მის თვალს.
- შეგიძლიათ გვიამბოთ ნიღბების სტილის რამდენი ვარიანტი შესთავაზეთ დამკვეთს?
სალომე: თავდაპირველად, ნიღბებამდე გვქონდა ლოგოს 3 განსხვავებული ვარიანტი, ერთი ეს არსებული ლოგო, მეორე თეატრალური ცნობილი პერსონაჟები მალვინა და პიერო, და მესამე ტიპოგრაფიული ვერსია, რომელიც გაცოცხლებული იყო თვალების მეშვეობით. თავდაპირველად შეიქმნა გეომეტრიული მოცეკვავე ფიგურები, რომლის თავებიც იყვნენ ბერიკების პერსონაჟები, თუმცა ისევ ლოგოს პრინციპებიდან გამომდინარე, რადგან იყო ძალიან დეტალიზირებული, და შორიდან რთული აღსაქმელი, ამიტომ გაჩნდა იდეა რომ ცალკე გამოგვეტანა პერსონაჟების თავები და ერთმანეთთან სიმეტრიულად განგველაგებინა.
- როგორ იქნა შერჩეული შრიფტი გამოსახულებებისათვის?
ელენე: გვსურდა, რომ ქართველი ტიპოგრაფების უნიკალური შრიფტები გამოგვეყენებინა, თუმცა ვერ მოხერხდა გარკვეული მიზეზების გამო. ამიტომ შევარჩიეთ სადა Sans Serif ფონტი, რომელიც მიყვება ფიგურების ფორმებს და აბალანსებს ჩვენს მიერ შემუშავებულ ლოგოს დიზაინს, რადგან რაც არ უნდა მარტივი ვუწოდოთ, მაინც ბევრ დეტალს მოიცავს, თვალების და ფერების გათვალისწინებით.
- როგორ მიმდინარეობდა კონცეფციის და დიზაინის შეთანხმების პროცესი დამკვეთთან?
სალომე: საკმაოდ საინტერესო პროცესი იყო. ორივე მხარეს მოგვიწია კომპრომისებზე წასვლა, საბოლოოდ კი მივიღეთ შედეგი, რომლითაც ორივე მხარე კმაყოფილი იყო. თავდაპირველად ჩვენ შევთავაზეთ არსებული ლოგო თვალების გარეშე, რადგან თვალები უფრო დეტალიზებულს ხდიდა მას, თუმცა დამკვეთის თხოვნით გავაცოცხლეთ ფიგურები. ასევე დიდხანს ვარწმუნებდით მათ, რომ ლოგოტიპად უმჯობესი იყო მხოლოდ თავების გამოყენება, ხოლო დიზაინის ელემენტად შესაძლებელი იყო აქტიურად გამოგვეყენებინა პერსონაჟების სრულყოფილი ვერსია, რომელიც გვხვდება ახლა ბრენდბუქში.
- Adobe-ის რომელი პროგრამები გაქვთ გამოყენებული აღნიშნული პროექტის ფარგლებში?
სალომე: Adobe Illustrator, Adobe Indesign. Adobe Illustrator-ის საშუალებით გეომეტრიული ფიგურების გამოყენებით დავხატეთ გულის ფორმა, რომელიც შეიქმნა ორი მართკუთხედისგან, ხოლო შემდეგ მოვუმრგვალეთ კუთხეები, რადგან უფრო შეგვემსუბუქებინა ვიზუალი. დანარჩენი მასკების საბაზისო ჩონჩხი გულის ფიგურაზეა აგებული, რადგან საბოლოო ჯამში მიგვეღო სიმეტრიული, თვალისთვის სასიამოვნოდ აღსაქმელი ფიგურების ერთობლიობა.
- რომელ პროგრამაში აიკინძა ტექსტური მასალები (ბროშურები, ჟურნალები, ბილეთები)?
სალომე: Adobe Indesign - ის საშუალებით აიკინძა ფესტივალის პროგრამა, ბროშურები და ბეიჯები. InDesign-ის მოქნილი ბადეები (გრიდები) საშუალებას გვაძლევს მარტივად და ამასთანავე ორიგინალურად, თვალისთვის სასიამოვნოდ განვალაგოთ არსებული ინფორმაცია ფორმატზე.
- თქვენს მიერ შედგენილი ვიზუალიზაცია წარმოდგენილია სხვადასხვა ტიპის ნივთებზე. ეს ტექნიკური დავალების ნაწილი იყო დამკვეთის მხრიდან თუ დიზაინის გამოყენების სია თქვენ თავად შეადგინეთ?
ელენე: დამკვეთის მხრიდან დავალების ერთ-ერთი მოთხოვნა იყო, გარკვეული საბეჭდი მასალისა და ციფრული ვიზუალიზაციების შემუშავება. აბსოლუტურად ყველაფერი, რაც წარმოდგენილი გვაქვს ჩვენს პორტფოლიოში, განხორციელდა 2023 წელს, უშუალოდ ფესტივალისათვის. ღონისძიებას საკმაოდ კარგი გამოხმაურება მოჰყვა საზოგადოების მხრიდან. ჩვენი ინფორმაციით, დიდი ალბათობით შემდეგ წელსაც გეგმავენ ფესტივალის ჩატარებას, შესაბამისად გამოიყენებენ არსებულ დიზაინს, თუმცა შესაძლებელია ორგანიზატორებმა მოითხოვონ დიზაინში სიახლეების დამატება, რაშიც ჩვენ სიამოვნებით ჩავერთვებით.
- თუ შეიძლება, დამწყებ დიზაინერებს რჩევები მიეცით რას უნდა მიაქციონ ყურადღება პროექტის ფარგლებში, სად ეძიონ ინსპირაციას და იდეებს? როგორ აჩვენონ და წარმოაჩინონ მაქსიმალურად თავიანთი კრეატიული უნარები.
სალომე: დამწყებ დიზაინერებს ვურჩევდით, რომ სრულყოფილი ინფორმაცია მოიძიონ არსებულ საკითხთან დაკავშირებით და ეცადონ მკაფიოდ გაერკვიონ დამკვეთის მოთხოვნილებებში და მათ ხედვაში, აუცილებლად გამოიკვლიონ კონკურენტების უპირატესობები და ნაკლოვანებები. რაც შეეხება ინსპირაციას, ძალიან ინდივიდუალურია. დღესდღეობით გვაქვს უამრავი წყარო, რითიც შეგვიძლია ინსპირაცია მივიღოთ. ეს იქნება ინტერნეტ სივრცე, ფილმები, წიგნები თუ უბრალოდ ქუჩაში არსებული გარე ფასადები და მათი ჩრდილები. მთავარია გონება ყოველთვის მომართული იყოს ძიების რეჟიმზე. ჩვენ ყოველთვის როდესაც რამე საინტერესოს აღმოვაჩენთ ირგვლივ, ვინიშნავთ და მომავალში, ახალი პროექტის დაწყებისას, აუცილებლად გადავავლებთ ხოლმე თვალს და სხვათაშორის ყოველთვის ვპოულობთ საჭირო მასალას.
პროექტი: სიღნაღის თეატრალური ფესტივალის ვიზუალური იდენტობა
პროექტზე მუშაობდნენ:
სალომე საყვარელიძე - Oeuvre Design Studio-ს თანადამფუძნებელი
ელენე ბოჭორიშვილი - Oeuvre Design Studio-ს თანადამფუძნებელი
კომპანიის შესახებ: უვრა დიზაინ სტუდია დაარსდა 2022 წლის ოქტომბერში. სტუდია აერთიანებს სამ დიზაინერს და მუშაობს ციფრული დიზაინის მიმართულებით. ამ დროისთვის ითვლის 50+ წარმატებულ პროექტს.
