ჩვენი გუნდის წევრები - თეონა არჩუაძე და ეთუკა სამსონია

გვინდა გაგაცნოთ ჩვენი ორი გამორჩეული თანამშრომელი, რომლებსაც Noventiq Georgia-ში მუშაობის ერთი წელი შეუსრულდათ. გადავწყვიტეთ მათთან ჩაგვეწერა ერთობლივი ინტერვიუ, რომელშიც ისინი საუბრობენ კომპანიაში თავიანთ გამოცდილებასა და საქმიანობის სპეციფიკაზე.

თეონა არჩუაძე, ჩვენი ინოვაციური ელექტრონული კომერციის მენეჯერია, ხოლო ეთუკა სამსონია, ოფისის მენეჯერი და თეონასთან ერთად Noventiqstore.ge-ს გუნდის წარმომადგენელია. მათ სულ რაღაც ერთი წლის განმავლობაში  წარუშლელი კვალი დატოვეს კომპანიის კულტურაზე, შეავსეს იგი თავიანთი მეგობრული მიდგომით, მიზანდასახულობითა და ერთგულებით.

1. როგორ დაიწყო თქვენი მოგზაურობა ინფორმაციული ტექნოლოგიების სფეროში და ამჟამად რა როლი გაქვთ კომპანიაში?

თეონა: ამ სფეროში უკვე მეექვსე წელია ვმუშაობ. 21 წლის ვიყავი, როცა საგანმანათლებლო მიმართულებით დავიწყე ტექნოლოგიების სფეროში მუშაობა. ჩემთვის ეს ბიზნესი იმდენად საინტერესო აღმოჩნდა, რომ თინეიჯერობაში არჩეული პროფესია გვერდზე გადავდე და მთლიანად ამ მიმართულებით დავიწყე კარიერული განვითარება.

ამ ეტაპისთვის, Noventiq Georgia-ში მე ვარ ელექტრონული კომერციის მენეჯერი, შესაბამისად ყველა სამუშაო პროცესში ვარ ჩართული ამ მიმართულებით.

ეთუკა: Noventiq Georgia-მდე არასდროს მიმუშავია ამ სფეროში და არც ამ პოზიციაზე, თუმცა აქ მიღებულმა ცოდნამ და გამოცდილებამ მიმახვედრა, რომ ეს ის მიმართულებაა, სადაც მომავალში თავს ვხედავ. ჩემს ფუნქცია-მოვალეობებში შედის ოფისთან დაკავშირებული სხვადასხვა საქმიანობა, ასევე ელექტრონული კომერციის მიმართულებით პროდუქციის დამუშავება, მარაგებისა და ფასების კონტროლი, მომხმარებელთა მხარდაჭერა.

2. ეთუკა, თქვენი როლი მოიცავს სხვადასხვა პასუხისმგებლობებს კომპანიაში, როგორ ახერხებთ ყოველივე ამის ეფექტურად დაბალანსებას?

ეთუკა: ჩემთვის პირველი რამდენიმე თვე დროის მენეჯმენტი ნამდვილად დიდ გამოწვევას წარმოადგენდა. თუმცა დავიწყე დღის განმავლობაში გასაკეთებელი საქმეების დაგეგმარება, რაც მიმარტივებდა დროისა და ენერგიის სწორად განაწილებას.
დღეს ჩემთვის ეს ფუნქცია-მოვალეობები აღარ წარმოადგენს სირთულეს, მაგრამ საქმის სპეციფიკიდან გამომდინარე მუდმივად მიწევს სიახლეებთან ადაპტირება და განვითარება.

თეონა: ეთუკა გამოირჩევა თავისი დაგეგმარების უნარებით, თუნდაც ჩვენს მიმართულებაში, მან ყოველთვის რამდენიმე დღით ადრე იცის, თუ რა საქმეები აქვს გასაკეთებელი.

3. რითია გამორჩეული თქვენთვის Noventiq Georgia?

ეთუკა: არასდროს არ დამავიწყდება ჩემი პირველი დღე კომპანიაში. იქიდან გამომდინარე, რომ აქამდე ოფისის მენეჯერის პოზიციაზე მუშაობის გამოცდილება არ მქონდა, ძალიან მიძნელდებოდა ერთდროულად უამრავ საქმეზე ორიენტირება, თუმცა Noventiq-ში შემოსვლის პირველივე წუთიდან ისეთი სითბო და ყურადღება მივიღე თითოეული თანამშრომლისგან, მაშინვე მივხვდი, რომ სწორ ადგილას მოვხვდი. მთავარი მიზეზი, თუ რატომაც ავირჩიე ეს კომპანია, არის თანამშრომლების უშუალო და მეგობრული დამოკიდებულება, რამაც შემაყვარა ჩემი ახალი პროფესია და ყოველდღიური საქმიანობა.

თეონა:  2 წლის განმავლობაში სხვადასხვა პროექტზე ვმუშაობდი დისტანციურად. შემდეგ გადავწყვიტე, რომ დრო იყო, ისევ აქტიურად დავბრუნებულიყავი საოფისე სამუშაო გარემოს. ჩემთვის გადამწყვეტი მნიშვნელობა აქვს ადგილს, სადაც ყოველდღიურად მომიწევს ყოფნა, ამიტომ დიდი სიფრთხილით დავიწყე ახალი კომპანიების მოძიება და მათთვის რეზიუმეს გაზიარება.

როდესაც Noventiq Georgia-ს ვაკანსია ვნახე კომპანიის შესახებ, დამატებითი ინფორმაციის მისაღებად  ერთ-ერთ თანამშრომელს მივწერე. მისგან მიღებული პასუხების შემდეგაც, 1 კვირა ვფიქრობდი გამომეგზავნა თუ არა CV ვაკანსიაზე. გასაუბრებაზე მოსვლისთანავე, ძალიან დიდი შთაბეჭდილება მოახდინა ოფისში არსებულმა გარემომ,  უზარმაზარმა მარმარილოს კიბეებმა და მისაღებმა. მაშინვე ვიეჭვე რომ რაღაც კარგი ხდებოდა აქ. 

კომპანიაში საქმის მიმართ იმდენად სერიოზული განწყობა და დამოკიდებულება დამხვდა, რომ  პირველივე წამიდან მივხვდი - აქ ხალხი მხოლოდ ‘’მუშაობისთვის’’ კი არ მუშაობდა, არამედ მათ აერთიანებდათ რაღაც ერთი დიადი იდეა და მიზანი.

4. რას ფიქრობთ, რა არის ჩვენი IT პროდუქტების ონლაინ მაღაზიის მთავარი უპირატესობა?

თეონა: ჩვენთვის მთავარია მომხმარებელს შევუქმნათ ონლაინ შოპინგის საუკეთესო გამოცდილება, რაც გულისხმობს ყიდვის პროცესის იმდენად გამარტივებას, რომ მათთვის ეს დასამახსოვრებელი იყოს.  ერთ-ერთი უპირატესობა - გულწრფელობაა. ჩვენ ყოველთვის ზუსტ ინფორმაციას ვაწვდით მომხმარებელს პროდუქციის შესახებ, რაც მათი ნდობისა და სამომავლო თანამშრომლობის მოპოვებაში გვეხმარება.

იქიდან გამომდინარე, რომ Noventiq Georgia არის IT ინტეგრატორი კომპანია, ძირითადი აქცენტი გვაქვს ამ მიმართულებაზე.  ჩვენ მომხმარებლებს არა მარტო Hardware პროდუქციას  ვთავაზობთ, არამედ Software მიმართულებითაც გვაქვს მაღაზიაში წარმოდგენილი პროდუქტები ისეთი წამყვანი ვენდორებისგან, როგორებიც არის Microsoft 365, ESET, Adobe, Autodesk.

მონაცემთა და უკუკავშირის ანალიზზე დაფუძნებით, ვსწავლობთ ჩვენს აუდიტორიას, ბაზარზე არსებულ მოთხოვნებს და ვცდილობთ, კონკრეტულ პერიოდში, კონკრეტულ ინტერესთა ჯგუფებს გავუზიაროთ მათთვის საინტერესო შეთავაზებები. ჩვენი მიზანია, რომ მომხმარებლისთვის ძალიან მარტივი იყოს გადაწყვეტილების მიღების პროცესი.

ჩვენთან გამარტივებულია როგორ პირდაპირი ანგარიშსწორება, ისე განვადების გაკეთება. ლოჯისტიკის კუთხითაც, თუ რაიმე ტექნოლოგიური სიახლეა,  ყოველთვის ვცდილობთ ფეხი ავუბათ დროს და  რაც შეიძლება მარტივად ინტეგრირებადი გავხადოთ ჩვენი ვებ-გვერდი ინოვაციებთან.

ეთუკა: ვფიქრობ, გამოვირჩევით ოპერატიულობით. ვგულისხმობ იმას, რომ, როცა მომხმარებელი თუნდაც არასამუშაო საათებში გვწერს, ჩვენ მაინც ამომწურავ პასუხებს ვაწვდით. მე, როგორც მომხმარებელს, მქონია შემთხვევები, როცა მიმიწერია მაღაზიისთვის და მათი პასუხის დაგვიანების გამო გადამიფიქრებია პროდუქტის შეძენა. ასევე მუდმივად ვიკვლევთ ბაზარს და ვცდილობთ ყოველთვის დაბალი ფასებით გამოვირჩეოდეთ.

5. ეთუკა, რა ქმნის შენთვის კომფორტს გუნდში?

ეთუკა: ჩემთვის უმნიშვნელოვანესია თანამშრომლებს ჰქონდეთ ერთმანეთთან ჰარმონია. თუ მათ შორის ცუდი ურთიერთობაა, მაშინ როგორც ინდივიდს, ისე მთლიან გუნდს გაუჭირდება კომპანიაში დასახული მიზნებისა და წარმატების მიღწევა. მაგალითად, მე რომ თეოსთან მეგობრული და კოლეგიალური ურთიერთობა არ მქონდეს, ემოციურად ძალიან რთული იქნებოდა ყოველდღიური მოვალეობების შესრულება და საქმეზე ორიენტირება.

6. როგორ უწყობს  ხელს კომპანიის კულტურა თქვენს პროფესიულ ზრდასა და განვითარებას?

ეთუკა: კომპანია თანამშრომლებს სხვადასხვა ტიპის კურსებს უფინანსებს, რითაც იზრდება გუნდის პროფესიონალიზმი და ცოდნა კონკრეტული მიმართულებებით. ასევე კომპანიაში ნათლად იგრძნობა სტაბილურობა, რაც დღევანდელ დღეს დასაქმებული ადამიანებისათვის ერთ-ერთი პრიორიტეტულია.

თეონა: აქ ფასდება ახალი იდეები და ინიციატივები. კომპანიის კორპორატიული კულტურიდან გამომდინარე, არ გვერიდება ახალი იდეების გაჟღერება. ყველა რანგის თანამშრომელს აქვს სიახლეების მიღების მზაობა. შესაბამისად, ეს უშუალო დამოკიდებულება, გვეხმარება ჩვენი იდეების დახვეწასა და განვითარებაში.

7. რა თვისებები დაგეხმარებათ კომპანიაში წარმატების მისაღწევად?

ეთუკა: მიზანდასახულობა და შრომისმოყვარეობა. როგორც ყველა სფეროში, ჩვენთანაც ეს თვისებები ყველაზე მეტად ფასდება. თუმცა, აღსანიშნავია ისიც, რომ თუ არ გიყვარს სფერო, სადაც მუშაობ, მხოლოდ მიზანდასახულობითა და შრომისმოყვარეობით გაგიჭირდება წარმატების მიღწევა.

თეონა: წარმატება და ეფექტური მუშაობა ჩემთვის ენთუზიაზმით და დისციპლინით განისაზღვრება. ვფიქრობ, უმნიშვნელოვანესია ამ ორი თვისების კომბინაცია.

8. და ბოლოს, რას  ურჩევდით ახალ თანამშრომლებს, რომლებიც შეუერთდნენ Noventiq Georgia-ს ან აპირებენ ჩვენთან თანამშრომლობას? მოგეხსენებათ, რომ 2024 წელი კომპანიამ გუნდის გაფართოებით დაიწყო და ახალი ტალანტების ძიების პროცესშია.

ეთუკა: ვურჩევ, იყვნენ გუნდურები. გუნდური მუშაობის გარეშე ჩვენს კომპანიაში წარმატების მიღწევა, ვფიქრობ რთული იქნებოდა. რაც არ უნდა ბევრი თანამშრომელი გვყავდეს, თუ გუნდს არ აქვს საერთო მიზნისკენ სწრაფვის განცდა, წარმატების მიღწევა უფრო რთულ პროცესად იქცევა.

თეონა: ძალიან მიყვარს გამოთქმა „Thinking outside the box“, Noventiq-ში ჩარჩოებს უნდა გაცდე და ყოველთვის უნდა იყო მზად მიიღო ინოვაციები და მომენტალურად აჰყვე დროს.

თეონას და ეთუკას მუშაობის სტილი მაგალითია ჩვენი კომპანიის გუნდურობის, ინოვაციებისკენ სწრაფვის და საქმისადმი თავდადების კუთხით. მათი Noventiq Georgia-ში მოგზაურობა ასახავს ჩვენი კორპორატიული კულტურის არსს, სადაც სითბო, თანამშრომლობა და წარმატებისკენ მუდმივი სწრაფვა სუფევს.